焰拉麵 (已結業)

焰拉面，一听就觉得热辣辣，烈火燃烧嘅感觉。但今次嚟到，其中一个主角就冻冰冰嘅雪糕，仲要系雪糕拉面。一众友人都好担心雪糕拉面到底味道如何，所以决定share。主食我点左一个沾面，始终都系我至爱。鱼介沾面汁味道浓郁。面质为配沾面都系用粗面，胜在够挂汁。块叉烧做得好好，够厚身，而且肥瘦均匀，表面烧得充满炭火香。饺子亦系特色菜式，日式常见做法，焗熟饺子时加入少量面粉水。效果就会好似飞碟咁，有一块脆皮连喺饺子皮度。虽然对味道无乜变化，但多左重香脆口感，都好值得一试。压轴主角出场，雪糕拉面。感觉有少少似沙律冷面，配料都系清新蔬菜。有番茄，爽口嘅日本海藻，加块脆脆嘅云吞皮。雪糕系豆腐味，食法系加入酱汁，再溶部份雪糕一齐食。酱汁本身有少少似冷面汁，味道清淡，但溶左雪糕入去就会产生化学作用，成个味唔同晒。记得千奇唔好分开个雪糕食，个雪糕颇大，其实溶左落个汁度都仲有好多剩低，唔洗悭。虽然佢叫做一个冷面，但感觉作为餐前沙律会更合适。