風雲丸 (已結業)

係灣仔軒尼詩道既風雲丸，往往都係環排長龍既地方，但今日難得六點幾咁早就係灣仔見唔洗排隊，即刻衝左入去。基本上店內每個人都係食佢既豚骨魚介味玉沾麵，咁我都唔例外，再另外叫多一碟羽根餃子試下。佢地既招牌就係一路食一路熱住沾麵湯既石鍋，上台時一路滾住，都幾有gimmick。佢啲麵都幾掛湯，但就咸左少少，而啲麵食落口質地軟硬適中。佢隻蛋就正正常常，普遍質素。而佢既叉燒係幾大舊，亦都有肥有瘦，食落口少少油香，軟腍腍好好味。佢既羽根餃子就比較上冇乜特色，街外普遍質素，比較想試下佢個炸雞。