雄記美食

营业中

休息中

eat乜牛杂牛腩 | 湾仔碗汤好饮到一滴都冇剩！牛杂米，加牛腩。小编每次去都会咁叫，为的就系个汤底，因为真系好好好好味。好香，好浓郁，饮完一啖好想饮多啖。但系，就算饮哂成碗，都完全无口干口渴，可见个汤底无味精，系真材实料。「老板娘，个汤劲好饮，我想问系咪药材汤嚟㗎？」小编唔识嘢，走咗去问老板娘。「梗系唔系啦！无落任何药材！系纯粹用牛熬出嚟，系100%牛汤！」老板娘坚定但非常友善咁回应。佢𠮶个笑容有啲似一个呀妈精心炮制咗餐饭俾仔女食嘅感觉。😂个汤汁咁劲，啲牛腩牛杂都好难差得去边。牛腩入味，索晒啲汁。半肥瘦，有咬口，但亦够淋。牛杂干净，无任何餲味，但牛味仍然好香，唔会漂到咩味都无哂。如果你唔想食粉面，可以试下个东坡肉饭。小编老婆至爱。首先，肉够肥，又炆到入晒味。第二，个汁送饭一流，加埋啲豆卜，只会令你食唔停口。另外，介绍埋杯冬瓜茶。坊间一般嘅冬瓜茶都甜到无朋友，但呢杯少甜，反而令冬瓜茶𠮶种清凉，清爽感觉更加出，连怕甜嘅小编都爱不释手。好简单嘅饮品食物，但系却带俾你一种食完会挂住，会想翻去再食嘅味道。其实小编最钟意，最想介绍俾大家认识嘅就系呢类好认真制作，又好有人情味嘅小店。真心，去试下啦。