CHI Tachinomi (7號碼頭)

营业中

休息中

喺中环天星码头下层嘅一角，居然有一间地道嘅日式串烧屋台！抗疫疲劳加冇得去旅行嘅我哋，绝对唔可以错过呢个机会！7月嘅中环码头，有少少凉风，不过由于屋台系开放式，唔建议著长袖长裤嚟食。著件颓T同熟人嚟个轻松愉快聚会就合适不过。屋台当然唔少得饮嘢！三得利嘅Premium Malt 向来系我嘅至爱，当年喺日本搭新干线饮过罐啤，念念不忘。呢度供应生啤，幼滑嘅口感同味道更上一层楼。乌龙茶亦够冻。《日本鸡肉丸子串》($28) 烧得外脆内软，非常多汁，肉丸有咬口亦食得出鸡肉嘅texture。虽然唔系炭炉烧，但也接近日本当地水准。右边系《盐烧牛舌》($38)，牛舌切得稍薄但以呢个价钱而言味道出众。左边系《牛肉土手烧》($38)，疑似柱侯炆牛腩嘅煮法，酱汁较甜，充满牛肉香。用上牛腩同牛筋，文火细炆至入口即溶，啲牛汁亦非常美味。来一份《大阪牛肉饭》($90，大)，基本上系将牛肉土手烧放落圆润饱满嘅珍珠米上面，啲牛肉精华渗落啲饭度，食到唔停得口。《鳗鱼饭》($55，细) 鳗鱼一啲都唔腥，亦无同价位容易出现嘅鱼骨。鳗鱼烧得外脆内嫩之余，蒲烧酱落得恰到好处，即使净系嚟食呢个饭同牛肉饭都值得一来。