Sodam Chicken (已結業)

同朋友上网睇到呢间嘅🐔🐔好吸引，慕名而来，我哋叫咗个二人餐，拣咗焗鸡，韩风紫菜拼黄金咸蛋，跟餐仲有韩式凉拌水冷面同埋泡菜鱿鱼,另外单点一份太阳芝士炸鸡。太阳芝士炸鸡系呢间餐厅嘅招牌菜，鸡肉质感软硬适中，而且微辣好惹味，外皮炸得脆脆，未点芝士就咁食都好好食🤤芝士最表面果层有拉丝效果，但芝士味冇咁重，里面嘅芝士质感好稠，冇拉丝效果但味道香浓好多，点炸鸡食好正！最后剩底渗透芝士嘅面包，芝士味十足，面包口感比较韧。焗鸡方面，应该系炸过先去焗，可能因为焗过，焗鸡嘅鸡肉质感比较硬身，焗鸡表面满布韩式紫菜味粉，咸咸地，要连埋紫菜碎一齐食先好食，唯一比较麻烦系紫菜碎容易跌。黄金咸蛋表面湿湿地，食落冇咁干，而且咸蛋黄香味十分浓厚，值得一赞。😚韩式凉拌水冷面，冷面质感烟韧，十分弹牙，其实汤底味道好普通，但当我地食左好多炸鸡，食番淡冷面可以当中和一下油腻感觉。泡菜鱿鱼酸酸辣辣，同冷面一齐食好开胃。👍🏻呢度嘅炸鸡真系唔错，好期待下次再黎试其他口味。