禮賓傅 (已結業)

嚟过礼宾傅一次觉得唔错，呢次再嚟先知原来佢哋出咗个周末午餐。同一般嘅中菜有啲分别，呢度嘅菜式系位上，有啲西餐嘅感觉。先嚟嘅系两款凉拌小食，麻辣花胶云耳秋葵口感爽脆，辣度轻微。象拔蚌仔配粉皮，粉皮入面有切片象拔蚌仔、青瓜同肉碎等等，几鲜味。然后就系两款汤品，桂花鱼老鸡炖咸酸菜，汤色清澈，同埋加咗啲唐芹，味道清香。龙虾汤，味道酸酸哋，同埋仲有龙虾肉，估唔到可以晌中菜馆饮到呢款比较西式嘅汤品。沙汁明虾球，虾球炸得外脆内弹牙，酱汁酸甜。榄角蒸斑骨配炒萝卜糕，斑骨肉少但惹味，萝卜糕切成一口大小，食起嚟几香口。南瓜烩安格斯牛腩，牛腩软腍有牛味，南瓜又够香甜。桂花鲍鱼炒素翅，厨师将蛋黄炒成桂花咁，入面就仲有芽菜同素鱼翅。礼宾傅炒饭，用鲍鱼角、龙虾肉等等炒成，同埋用咗黑松露同青葱提味，米饭炒得粒粒分明又够干身。甜品一碟有两款，蛋白杏仁茶，味道讨好又养颜。天山雪莲炖雪耳，雪耳软中带爽，甜味啱啱好又顺喉。呢次试嘅菜式之中，我哋就比较钟意沙汁明虾球同南瓜烩安格斯牛腩。