老鍋台式火鍋 (京都廣場) (已結業)

麻甩佬同事准备打网球赛，同佢食餐好嘅预祝佢 赢，咁佢之后就可以请返我食饭🤭 一嚟到间餐厅，佢就话好似食过，仲要系几年前嘅事。我心谂间间你都话食过嘅🤨 点知佢同老板吹水，问以前旧舖系唔系喺尖沙咀？哈！原来佢真系食过！墙上贴满老板同唔同名人嘅合照，发哥都帮衬过，证明应该有料到🤪 《午市火锅套餐 $299》就有交易。当我仲谂紧要花胶美人锅定养生锅嘅时候，仲养生过我嘅麻甩佬二话不说要个尚膳养生锅。 汤头呈奶白色，超级足料：大大条人参同劲多红参、桂圆、红枣、杞子、冬菇、蜂巢豆腐。净系食汤料都饱。汤一落肚直情暖胃提气，佢即刻讲嘢大声咗📢 秋冬进补一流, 同手脚冰冷讲拜拜👋 鸡牛猪三选一，打边炉点可以冇肥牛。每卷肥牛共有两块，一定够喉。另外仲有台湾蛋饺、墨鱼丸、贡丸、鱼皮饺同埋啲蔬菜，饭同米线二选一。 麻甩佬本身仲以为唔够食，谂住加钱再叫，点知原来啲汤料真系唔惹少。最后我哋差唔多饮晒个汤底先走。