八方棧

营业中

休息中

餐厅位于科学园向海嘅一列餐厅，印象中以前呢一列餐厅只得西餐，今次有中餐饮茶，就带咗外父外母嚟试吓，今日温度相宜又有少少阳光，就坐欧多牙对住个海景叹茶。蟹子虾多士，虾多士炸得松脆而不带半点油份，面头虾胶比例丰富，虾胶嘅份量比起多士有过之而无不及，面头有蟹子吊出鲜味，系其他地方所没有的。牛油果鳗鱼春卷，日式鳗鱼同港式茶楼春卷呢个配搭非常创新，两者同属高质，不带半点违和感。榄角蒸排骨，由于点菜我无参与，初时以为排骨上面𠮶啲系豆豉，点知原来系榄角，味道配衬得嚟亦带半点惊喜。柚子鲜虾饺，虾饺饱满，用少许柚子入馔，又系创新嘅一道。妃子笑咸水角，呢个咸水角真系颠覆咗去饮茶食咸水角嘅固有印象，造型独特，成粒荔枝咁，因而冠名妃子笑，卖相好睇又好食。京沪千秋小笼包，小笼包里面嘅汤汁极多，整体令人非常满意。呢一间八方盏所有点心嘅出品都会喺传统上面加多少少新意，正正系坊间难得嘅态度。