新沙洞大排檔 (大政街)

营业中

休息中

放工约埋同事去大角咀揾食，行入横街见到新沙洞大排档五光十色嘅门面，即刻吸引我哋嘅目光，所以二话不说就冲入去。入面环境唔算好大，估唔到平日夜晚都会座无虚席，出面仲有人喺度等位，好彩我哋进场时间尚早，可以占据有利位置。韩国菜通常都会有泡菜，而新沙洞另外仲有芽菜做前菜，其实份量系多一倍，不过因为太肚饿，食咗一半先记得影相😅😅依家食韩国菜又点少得食炸鸡，我哋就拣咗柚子味嘅新沙洞炸鸡，韩式柚子酱上再洒上芝麻，简直系令人胃口大开。炸鸡外皮松脆，肉质嫩滑，配个甜甜酸酸嘅柚子汁，可以减去油腻感，食多几件都得。宫廷炖牛肋骨锅嘅牛肋骨大大件，配有丰富嘅配菜一同炖煮，我就最钟意佢嘅萝卜够晒入味，个牛骨汤仲好甜，份量好大，如果落埋个乌冬食应该仲正。由于我觉得牛肋骨汤系需要配淀粉质，冇米气到肚真系搞唔掂，所以就拣咗个炸虾芝士紫菜饭卷。大大件嘅饭卷卖相吸引，食到脆炸大虾之余又有香浓芝士及沙律酱汁，顿时丰富了味觉享受。秘制辣酱炒鱿鱼嘅每条鱿鱼都软绵绵好易咬，配上辣辣嘅酱汁，刺激味蕾，另外仲可以用生菜包住食，即刻解去辣度，真系越食越想食。饮品方面，我哋拣咗二人份量嘅草莓牛奶配蜂巢特饮，粉红色嘅卖相绝对系女士们嘅最爱。