BriKetenia (已結業)

有阵时真系会忽然好想食西餐！但西餐一系就好食但贵到食半个月人工，一系就平但似茶餐厅。不过之前去观塘揾朋友食饭先发现有呢间西餐厅价格相宜，菜式多，质素一流，值得推荐。其实我去𠮶时近情人节，餐厅都full booking架喇，幸好我地好早去，对方又好helpful帮忙调动一下啲坐位。就如好多西餐厅一样，briketenia环境较暗同安静，营造多啲私人空间比食客静静地倾计。Set dinner先黎既系法式洋葱汤，一上菜时洋葱汤既香气扑鼻，令人急不及待要试一啖！洋葱味道香甜，洋葱煮得柔软嫩滑，配上面头浓郁既芝士味道，忍唔住一口接一口到饮到清光啊～主菜我地分别叫咗乳猪同羊架，乳猪每一口充满油脂香，利用配菜上既芦笋同紫薯蓉清爽中和咗整碟菜式不致太肥腻。羊架五成熟煎得啱啱好口感唔会鞋，咬落去啲肉汁渗哂出黎，即使唔系食肉兽都会欲罢不能！甜品以芒果为主题，卖相讨好，特别推介芒果雪葩，酸酸甜甜，最适合配合法式小蛋糕同曲奇一齐食嘞。