小南國 (已結業)

话说我已经怀孕快九个月，行路已经同只龟无乜分别，所以都唔勉强出街堂食，老公放工买外卖返黎就算喇。今晚大肚婆好想食荠菜豆腐羹，于是买小南国返黎～老公系去到先口嗌，佢话唔系等咗好耐，15-20分钟就有得拎。两大一细叫咗都几多嘢，有荠菜豆腐羹、四川担担面、豆浆胜瓜、四喜烤麸、招牌炒饭、赛螃蟹。埋单$560!《荠菜豆腐羹》一如既往嘅好味，当然堂食热啲又有埋胡椒粉系好食啲嘅，但系我一条友饮晒成碗 ：）《四川担担面》汤同面系分开盒装，个面饼太整齐，拎到返屋企都硬咗，要剪开浸喺汤几分钟先叫做林返啲，但个汤底好好好好味，够辣，连肉碎都好惹味！满分！《豆浆胜瓜》唔知点解啲豆浆好似起咗渣咁，好彩无乜点影响味道，系个卖相走咗样。《四喜烤麸》呢个前菜外卖同堂食分别都不大，拎到返屋企依然好食！《招牌炒饭》第一次食，目测有虾、蛋、肉碎、豆角粒、辣椒碎（极微辣，只有我两岁女话辣），食落好似有咸蛋黄，然后唔知有啲咩材料，但好香好干身唔咸，下次会再叫。《赛螃蟹》麻麻地，唔知系咪冻咗，所以啲蛋白硬硬地，感觉唔多好，不会再叫。Overall 外卖黎讲算系唔错喇～