小方糖甜品 (荃好景大廈)

营业中

休息中

㖊晚同旧同事食甜品，男友诈型话未同过我食，于是今日趁早食完饭就揾下路德围附近有咩甜品店，方便食完搭车返屋企。喺开饭睇过menu觉得都啱食就去试吓。淋住雨去到门口见有位，嘟完安心就自己揾位坐。menu已经喺台上面。我叫咗芒乐多，menu上面介绍系益力多味沙冰，再加芒果肉、珍珠、椰果同椰子条。益力多沙冰好浓益力多味，酸酸甜甜好解腻。初头以为得几粒芒果肉，原来都唔算少，而且都几甜嘅～珍珠咬落都有微微嘅黑糖味，亦几烟韧，唔会俾沙冰冻到硬哂变咗口感。椰果就冇乜特别，不过个人钟意一粒粒嘅椰果，食落口感好啲。旁边几块应该系menu所讲嘅椰子条？？？其实系有芒果味嘅蒟蒻类物体，个人就麻麻喇。男友叫咗芒果紫米小丸子。食咗两啖，紫米足料，唔会太甜，如果有sweet tooth嘅可能会嫌佢淡啲。小丸子就冇乜味，我觉得如果有多啲甜味会好啲，唔系就好似食紧嚿粉团咁。清洁方面，我好怕甜品店清洁得唔干净，小方糖嘅台櫈同地下都干净唔会痴lub lub，呢样唔错。价钱、味道、清洁整体都唔错，但店员唔知系太热定心情唔好，基本上都系冇表情同唔出声嘅。