影片
更多
2023-04-23
421 浏览
上回讲到旺角多咗好多午市火锅，尤其是创兴广场，楼下一班阿姐日日得喺条街度派传单，几档火锅互片。攞啲单张研究吓，发觉几间都差唔多价钱，一于逐间试试佢。我就钟意一条友晏昼去打边炉，费事约嚟约去，随时兴起就食，而且包有位，唔使排队唔使同人迫。而且一个人坐晒成张枱，唔怕唔够位摆食物，非常之爽皮。呢个食评就系针对闲日晏昼嘅体验，晚市点样唔系今次嘅重点。我星期五大约2:20上到门口，知客岗位冇人，行入少少等，见有个阿姐想行出嚟又唔想行，隔住半间餐厅距离十几米向我示意询问，我又隔住半间餐厅距离十几米向佢打手势示意一位。望望楼面得十枱八枱客，廿人唔到，好忙咩？有冇懒成咁？其实睇样都知我系嚟食嘢啦，两手空空唔通送货咩？！就算送货你都要出嚟签收㗎啦！真吹涨！练精学懒成咁。呢啲服务质素真心唔掂，而家出街食饭普遍都系差，啲主管唔教，伙记就唔觉有问题，结果越整越衰。佢见我话一位先舍得行埋𠮶几步路出嚟带位，咁咪系啰，悭埋呢啲功夫多鬼余，结果咪又系要行，悭唔到又样衰，啲食肆真系要好好检讨吓。坐低之后睇睇枱面叠点餐纸，拣咗个酸菜猪肉汤底，叫番𠮶个乡音阿姐嚟，佢讲咗句我听唔明嘅说话，搞咗一轮我先明原来可以叫两个汤底。我
我就钟意一条友晏昼去打边炉，费事约嚟约去，随时兴起就食，而且包有位，唔使排队唔使同人迫。而且一个人坐晒成张枱，唔怕唔够位摆食物，非常之爽皮。呢个食评就系针对闲日晏昼嘅体验，晚市点样唔系今次嘅重点。
我星期五大约2:20上到门口，知客岗位冇人，行入少少等，见有个阿姐想行出嚟又唔想行，隔住半间餐厅距离十几米向我示意询问，我又隔住半间餐厅距离十几米向佢打手势示意一位。望望楼面得十枱八枱客，廿人唔到，好忙咩？有冇懒成咁？其实睇样都知我系嚟食嘢啦，两手空空唔通送货咩？！就算送货你都要出嚟签收㗎啦！真吹涨！练精学懒成咁。呢啲服务质素真心唔掂，而家出街食饭普遍都系差，啲主管唔教，伙记就唔觉有问题，结果越整越衰。
佢见我话一位先舍得行埋𠮶几步路出嚟带位，咁咪系啰，悭埋呢啲功夫多鬼余，结果咪又系要行，悭唔到又样衰，啲食肆真系要好好检讨吓。
坐低之后睇睇枱面叠点餐纸，拣咗个酸菜猪肉汤底，叫番𠮶个乡音阿姐嚟，佢讲咗句我听唔明嘅说话，搞咗一轮我先明原来可以叫两个汤底。我就望望仲有咩拣，望咗十秒都冇个阿姐已经唔耐烦，又讲一句我听唔明嘅说话，希望唔系乜我妈妈啦。我唔想佢继续乜我，就是但拣多个芫茜皮蛋，费事佢再讲多几句我听唔识嘅乡下话。我系睇漏咗，但都唔使咁，好声好气唔得嘅。
不过呢啲都系小意思，佢套固有观念唔系凭我讲几句就改变到，悭番啖气埋头食嘢好过，再讲多两讲又话我族内歧视就无谓。总之呢啲阿姐唔好预佢识得serve 客，求其做足送餐执碟就算佢做足本分。
讲番个火锅，佢都算多选择，自助区有两大排雪柜，啲肉同海鲜就上网落单。
咁讲真，佢啲食物质素算几好，牛肉有牛味，羊肉有羊味，啲虾爽口弹牙，青口鱼头𠮶啲都唔错，连粟米都甜过人，应该花过唔少心思去采购。最欣赏佢落单𠮶啲每款俾两件，啱晒单身狗，反正可以任叫，真系唔适宜俾太多。自助区又够阵容强大，想食边啲夹一旧就得，尽情地试食之余亦同时减少浪费，win win啦。
佢仲有甜品同雪糕。饮品除咗罐装包装嘅牌子嘢之外，仲有果汁机沙冰机咖啡机，一啲都唔马虎。
创兴呢度大大话话有十几间食肆，火锅都五六七八间，睇佢哋啲价钱真系互相诛到实，闲日晏昼都系百五蚊左右嘅价位，简直系割喉式竞争。喺咁激烈嘅环境之下，啲任食餐厅只有以质量取胜：选择要多，品质要靓，稍一不慎就俾人砌低。
香港人其实冇乜味觉，多数人只系睇价钱，见你平就踩定先，见贵就未食先赞。话食惯300蚊一位食唔惯呢啲150火锅，好好笑。写食评系需要多角度思考，净系单线条比价钱使鬼你写，斗贵就得。
老老实实，贵唔一定好，平唔一定差。早排我先去完一间尖沙咀火锅店，埋单每人七旧，食完都唔知食咗啲乜，打边炉都大半千，仲要自己煮，简直揾笨。反而呢啲平得嚟有质素食得仲开心，讲到底火锅只系大排档食物，系而家啲人搞埋啲花臣扮高档先又300又700，但点扮都始终摆脱唔到𠮶种大排档格局。
如果唔系阿姐做得差，我会俾哈哈笑，而家降级得番个 ok。如果有晒心理准备会俾人趷，呢间其实几食得过。
张贴
