嘉兵衛 (已搬遷) 新店位置

同屋企人食饭，佢地喜欢日本野所以就带佢地黎呢间响母校附近的日式小店，食过一次午餐，但晚饭都系第一次。七点九黎到都坐满左九成，落单前老板娘已经同我地讲定因为系即叫即煮，所以会等得比较耐，前面好几张枱的客都未有野食，而望返厨房只有两人煮野食。所以黎呢度食晚餐，需要预返落单后最少半个钟先会有野食。但食物质素令我觉得等都值得！点左个塩烧黑豚扒定食，上菜时有埋胡椒同盐俾你调味，不过个人觉得本身已经好够味，肉带少少肥膏，所以咬落去肉汁非常多，肉质都比较嫩，只系食到边边位就会实返少少，但都系水准之内。黑豚扒旁边配生菜丝，另外仲有味噌汤，一睇之下已经觉得不得了，汤用左好多材料去煮，连肉粒都煮得非常入味同淋，系一咬即散开同溶的感觉。食日本野不妨配返支细细的清酒，180ml的白壁藏纯米酒非常易入口的。