籠太子點心專門店 (已結業)

今晚系筲箕湾东大街食晚餐，突然想食点心但冇得饮茶，所以就去咗笼太子点心专门店，餐厅上菜速度快，每枱仲放咗一壶玄米茶方便添饮。首先梗系嗌虾饺啦，佢哋嘅笼太子虾饺皇可以只叫两只，唔需要担心太饱，虾饺同虾都好大粒而且热辣辣。之后叫咗多汁蟹籽小笼包，小笼包入面有姜丝，唔需要另外加，馅肉亦都够juicy。仲叫咗黑松露烧卖，比一般烧卖多咗阵黑松露香，但咬落一样啖啖肉。晚餐都要有饭落肚嘅，所以我哋就试咗石斑荷叶笼仔饭 ，可以拣落葱同豉油调味。饭入面有蛋丝，每啖饭都夹杂著蛋香同荷叶香，石斑鱼肉弹牙有鲜味，亦唔会腥。是日精选老火汤系霸王花煲猪骨汤，每羹都感受到胶质十足，非常足料，饮落甜甜地同时唔会太油腻。最后叫咗碟菜心，颜色翠绿而且嫩口鲜甜。