富士山55 (拉麵沾麵專門店) (已結業)

今晚同老婆拍拖睇戏，时间唔多决定试下呢间沾面。嚟到6：45，唔使等，廿几个位坐咗一半，我哋坐喺对住幅墙嘅位。老婆为海胆沾面而嚟，冇乜点谂，叫咗软面同走葱 $188。我就叫咗特浓猪骨沾面$88，因为惊沾面唔浓唔好食。我嘅猪骨到先，有葱、半只蛋、笋、两块叉烧。先食叉烧，肥瘦适中之余，佢有微微烧焦香，系我喺日式叉烧中未试过嘅…其实叉烧系咪应该咁？汤底有浓浓鲣鱼味，比猪骨更突出，我觉得抢咗风头唔balanced；蛋系做到糖心亦入味相当唔错；面比平时汤面嘅粗身，更有咬口，沾汤后仍然食到麦味，唔错。海胆沾面嚟到，有三格嘅海胆份量，上面仲有少量鱼子。食啖海胆，先甜后苦，似乎唔系最新鲜，失望。鱼子饱满鲜甜 ok。汤汁加入咗海胆，多咗甜味，几特别，不过我同老婆都prefer 猪骨𠮶个。最后系面，虽然点咗要软身，但食落同我𠮶D冇乜分别…最后我都有后加鲣鱼汤再饮咗两啖，都系𠮶句，俾鲣鱼抢晒。总括，猪骨浓汤系 ok 嘅，海胆就唔值贵一倍有多啰。