越北牛肉粉

营业中

休息中

今日朋友约我陪佢带个仔去冒险乐园玩。玩完对面正正就有呢间越北餐厅，小朋友又饿，价钱又唔贵就决定喺度食。夜晚佢哋有套餐,可以拣小食，主菜同饮品。我地就要咗个生牛肉汤粉配越式烤猪颈肉同埋薄荷青柠梳打。另外就再叫咗个路边烤鸡肉串捞檬同越北招牌牛肉丸汤。烤猪颈肉，份量都几多，外侧烤得够香口，用上炸蒜同香葱去烤，食落多左一重香气，猪颈肉唔会鞋口，好味！生牛肉最紧要汤底够热，呢度个汤底就做到！而且汤底味道清香，浓郁，生牛肉份量十足，轻轻浸喺汤底就食得，牛肉非常嫩滑！汤底配埋河粉同其他配料（青柠，辣椒等）一齐食更有风味，饮埋汤底都唔会口渴，食得好滋味。鸡肉串一客3串，上面同样撒满炸蒜香葱，鸡串够嫩滑惹味，捞檬嘅灵魂酱汁味道岩岩好，淡淡酸酸辣辣，捞檬弹牙嘅口感，食落特别开胃。牛肉丸汤又系另一推介，一客有8粒，牛肉味浓，仲有d脂肪系入面，咬落非常爽口弹牙，口感十足， 白萝卜吸收晒汤汁，甜甜又无渣，好食！饮埋青柠梳打，清新醒神，凉透心，大满足！