臺坊 (加拿分道) (已結業)

尖沙咀厚福街出名多野食，俾呢间喺转角位嘅台湾餐厅吸引，门面同装修都比较简约，有啲古早味嘅感觉。店员都非常有礼貌，入到去可以先坐低睇咗食咩再出收银落单，我今次就叫咗餐牌上面推荐嘅几样食物，分别系蒜汁鸡丝冷面、炸猪扒肉燥饭、麻辣海蜇鸡丝、以及食台湾野必备嘅珍珠奶茶。落咗单之后5分钟内就已经上齐嘢食，真系非常有效率，而且每样嘢食都非常满，一定唔怕唔够食。蒜汁鸡丝冷面个汁非常好味，加埋啲鸡丝非常嫩滑，捞埋啲青瓜同冷面配搭非常好，我自己个人非常喜欢呢个，如果夏天食更加系非常适合。炸猪扒肉燥饭都非常唔错，炸猪扒会已经帮你切件，非常贴心，个炸猪扒炸得好松脆，猪扒肉质亦都唔会好实，肉操上面加咗啲菜脯，捞埋啲饭同肉燥一齐食嘅时候更加有口感同好味。麻辣海蜇鸡柳作为小食非常开胃，佢个麻辣食落都几辣，加埋海蜇同鸡肉呢个配搭，味道唔错。珍珠奶茶同出边饮𠮶啲都差不多，亦都可以选择甜度同冰量，我自己就嗌左半糖小冰，如果个海蜇觉得好辣嘅时候就可以饮几啖啦！整体食物味道都很好，而且性价比高，就好似去咗台湾咁，地道得黎冇一啲浮夸嘅摆盘，值得一试！另外都见到餐厅设立自助外卖机，如果想买外卖就唔使排队等落单啦，非常方便！