麻辣風雲 (已改名) 查看

负分，极度建议麻辣风云改名做餐饮业之耻，啲嘢食直头可以用猪馊嚟形容。叫咗一碟瑶柱蛋白菜粒炒饭，葱爆羊肉同埋杯唔记得咩水蜜桃杂果茶。简单啲讲杯嘢饮先，个味同你喺7仔买支装𠮶啲水蜜桃茶一样味，严重怀疑系同一支嘢倒落去，仲要买$38。碟炒饭同埋炒羊肉都系上枱完全闻唔到有香味，就算你饭煲煲饭都会有饭香味吖，佢系乜都冇，炒饭食落去完全冇味不特止，啲饭仲要系未炒透，啲饭一嚿嚿，有啲个心仲系冻嘅成碟嘢，口感30度左右完全唔够热，碟嘢叫瑶柱蛋白菜粒炒饭，虽然瑶柱同蛋白都系有但系完全食唔到有味啰。碟葱爆羊肉仲过分，羊肉有冇臊味都好取决于只羊食咩，但至少你葱爆都会有阵葱味卦，sorry并没有，啲羊肉系过火度硬到一个点，咬落去唔系嚡咁简单系你羊肉片煮到㶶晒𠮶只硬，预期话葱爆羊肉不如改名做炒羊肉干仲贴切。成餐饭一个炒饭一碟羊肉干一杯嘢饮，梗系买+1 235埋单，系我食过最贵嘅猪馊。真心完全唔建议去食，就算有人请都唔会再去，完。