生滾粥的選擇都算多，不過就冇傳統粥店有嘅皮蛋瘦肉、 艇仔粥，相反有冬菇、粟米、鯪魚球等特別的配料。最後，我就點左一碗冬菇雞球粥。
冬菇雞球粥（評分：⭐️⭐️⭐️⭐️）
呢間係位於置富都會的food court，所以係以自助形式點餐，買完之後，店員會比個牌你，咁你就可以搵個位坐低慢慢等。當時大約中午時分但可能係因為星期六的關係，所以成場唔算多人，但因為係生滾粥，要即刻煮，所以我大約等了5至10分鐘先有。
一收到的時候，最令人驚喜的是碗粥是用沙煲裝住，保溫程度非常高，所以就算食得幾慢都好，都唔會怕啲粥會攤凍。
喺味道方面，冬菇雞球粥入面當然會有冬菇同雞啦，另外仲有少少娃娃菜，加上葱花。味道不錯👍🏽而且如果買粥，仲可以加$6有一碟腸粉或者加$6有飲品或汽水。所以我加咗一碟腸粉，味道都正正常常。如果想要其他醬料，店面亦有提供，可以另外自己落。
總括而言，我認為呢間舖的生滾粥味道不錯，選擇亦多。不過可惜的是，它是位於food court，同場有不少其他食店，雖然food court的座位十分多，但如果在中午時段可能會滿場。如果多人食就可能會搵唔到位。
另外，通風系統欠佳，所以坐左一陣成身好大陣油煙味。不過價錢十分合理，所以我整體而言，呢間舖我認為亦值得推介👍🏽
