皇玥

营业中

休息中

今天响黄埔行街，途经皇玥，系新开嘅，见有各式酥饼糕点，入去睇吓有咩零食买。同其他分店一样，呢度装修都好靓。之前买过皇玥出品嘅奶黄月饼送礼，朋友赞口不绝。金玥囍饼礼盒 （$138）本身打算买蝴蝶酥，然后被橱窗入边颜色鲜艳，造型可爱嘅唐果子吸引。呢个礼合有两款口味嘅蝴蝶酥（原味及伯爵茶味），同两款口味嘅唐果子（豆沙及柚子味），一次可以试晒4款，啱晒贪心嘅我。唐果子系唐代的宫廷传统特色糕点。经过改良嘅唐果子，用上了牛油、鸡蛋、面粉、莲子等不同食材。一口咬下去，口感松化，馅料满满，甜度适中，豆沙馅绵密，而柚子口味则果香清新。唐果子表面的装饰花系曲奇，好精致，睇得又食得。职员介绍每一件唐果子都是人手搓皮包馅，绝对系一件手工艺作品。呢度嘅蝴蝶酥系由米芝莲师傅主理，采用法国天然牛油。闻落下牛油香味自然，咬下去口感酥香松脆，食落唔会好腻，会令人一个接一个咁食，原味同伯爵茶都好味，钟意伯爵茶嘅朋友一定唔可以错过呢款伯爵茶口味嘅蝴蝶酥。伯爵茶薄脆精装礼盒 （$68）每一块薄脆都金黄香脆，纤薄的厚度令口感更为轻盈脆口，每一口都散发著牛油香，加上伯爵茶嘅香气，我个人好钟意，呢款薄脆绝对系下午茶嘅首选。