小神燈新派飯館 (已結業)

放工黎左小神灯食饭，入到去见到啲霓虹灯好靓，前少少有个电车卡座，墙身有唔同既漫画风布置介绍佢地既菜式。餐厅用怀旧玻璃胆水壶装滚水，真系卖少见少。Menu有好多特色小菜，花功夫既菜、新派野、家常菜，每样食材都有唔同煮法俾你拣。我地拣左啲特色野食，屋企难整😆糯米炒膏蟹系砂煲上热焫焫，打开盖见到好多蟹膏，仲有原只膏蟹食，糯米饭炒得好香够干身，粒粒分明又有少少饭焦，闻落有焦香味，食落烟烟韧韧。奇趣脆皮猪手，烧得好脆，每件切片厚薄平均，猪手肉焗得岩岩好唔会好干，点上芥末酱好食！腿茸菜胆鸡，半只鸡都好大份，鸡肉肉质嫩滑且结实，有鸡味食落啖啖肉，本身腌得好够味，唔需要点任何酱汁都好食。石澳梅菜蒸菜心，满满既梅菜丝、椒丝、葱花舖满菜心上面，蒸既时间岩岩好，菜心食落爽口。见到有杨枝甘露就叫左碗，好足料，味道清甜爽口带少少西柚酸，糖水唔会死甜。总括黎讲我地都几钟意呢间中菜馆，价钱公道，啲楼面姐姐又好。