海安咖啡室 (已結業)

海安对住信德中心，干诺道呢个位经常有五金工程类嘅车人出没，有少少大尘嘅感觉，不过咁又增加咗茶餐厅嘅怀旧气氛。十一点几十二点去到，冇乜人，不过差唔多所有卡位都有人留座。坐落冇耐，就陆续有客到。生意应该唔错。坐落点咗个招牌锅仔公司面同奶茶红豆冰。后者先上，前者后至。此冰基本上系红豆加冻奶茶。唔会太甜，奶茶亦算中上级数，加埋红豆一齐饮，味道十分有层次。奶茶本身味重，等啲冰溶到咁上下个味就最正。锅仔公司面可算系香港comfort food嘅精神代表。简单快捷又好食，速战速决，要comfort都要讲效率。公仔面加麻油，麻香一上枱已经扑鼻而至，其中加上太阳蛋，煎餐肉，肠仔，生牛，五香肉丁，同小量菜。原本应有叉烧，不过早到未有，以鸭胸取代。每样少少，加埋算配料十足。每样其实都唔算特别出众。老老实实，一个咁样嘅面自己向屋企都整到。而且呢类嘢食真系好难会难食或者特别好食。不过无论如何食起上嚟的确够晒comfort。呢个都算系香港特色：平凡有效率，虽无惊喜，却令人满意。总结：有怀旧嘅本土气氛。路过可以一试。下次我都会嚟再试下午茶先供应嘅西多类食品。