川之源

营业中

休息中

约西环友食饭，佢话无咩胃口，于是提议食辣嘢开下胃，钟意食辣嘅我当然举手赞成。叫得川之源，当然系以四川菜作招徕，不过餐牌都有「唔辣」系列，所以都可以叫唔食得辣嘅朋友一齐去。本身以为周末会只有单点，但原来有个假日二人套餐($288)立即点一个开心share！套餐就特色前菜、招牌菜、热菜各选一个，再送两碗白饭及两碗冰粉。最特别系菜式可以拣辣度，有BB辣、小辣、中辣及大辣，今次试小辣，有机会要试中辣！水煮鱼片 红当当嘅颜色已经好吸引，舖面果层辣油真系令人流哂口水，捞一捞都发现有好多块鱼片，唔会坊间有啲食几片就无，鱼片都好滑。仲有其他芽菜、宽粉，宽粉索尽辣油精华，超正！ 酸辣青瓜酸辣兼备，又唔会有死咸，青瓜爽脆，真系愈食愈开胃！手撕包菜以为佢唔辣，少年你太年轻了！佢除咗少许辣之外，仲加咗花椒，增加咗麻嘅口感，而菜都好清甜。桂花冰粉作为这一餐嘅句号，这款甜品真的满分。冰凉嘅冻感加上桂花嘅清香，一扫整顿嘅辣味，好舒服，如果唔系太饱真系会叫多碗食。虽然二人餐得几款菜式，但我哋两个人食已经饱到捧住个肚走，环境都干净企理，虽然做川菜但入去都唔会好大阵味。另外佢哋每台都会有一壶茶，虽则免费但都几清香。