貴族甜品 (元州街)

营业中

休息中

呢日外卖自取app又有做$8优惠，指定款式系红枣雪莲子炖桃胶(原价$43)。我食晏时成日会经过呢间糖水舖，但佢2点先开，所以未有机会试过。今日有优惠，就一于偷走买几碗同同事食下🙈。3点到去到舖头，无乜人，都唔奇嘅，学生又未放学。店员阿姐好熟悉用部外卖机😂，唔错，基本上唔使点等，就已经有得拎。糖水非常热辣辣👍，唔系摊冻哂。等嘅期间，我系咁宜揭下个menu，见到都几多选择，有港式有中式，定价都唔平。拎到返office都仲系热的，但个兜出面好似泻咗啲，有啲黐立立...。打开见到个糖水都清清地，用个匙羹撩起，系见到有唔少材料嘅，红枣、杞子、龙眼肉、雪燕、桃胶同皂角米，不过好似有啲料唔系好浸得开😅，桃胶同雪燕仲系一大饼/嚿，煲开咗唔应该系咁。再者，更恐怖系个糖水真系甜到起痰😖😖😖，太夸张了，好彩后尾加咗啲热水就好啲。总括嚟讲，如果斋讲呢碗糖水，就真系麻麻地，系几多料，但太太太太太甜😑，加上啲料未发得起哂，不过以优惠价嘅价钱谂，都接受嘅。至于其他甜品原价都唔太平，无乜特式嘢，环境又好一般，所以未必会嚟食，相信同区会有其他更好嘅选择。