君戶鍋貼大王 (已搬遷) 新店位置

今日嘅活动结束后，刚刚喺红磡区散Brand，夜晚晚又有啲饿，就见到呢一间「君户」，门口有个熟食档仔，新鲜生煎锅贴出炉！二话不说就立刻入去坐低，整番一碟锅贴啦！估唔到竟然有惊喜！除咗新鲜出炉劲加分，锅贴本身馅多，肉汁仲非常多！食完之后个碟底，都系肉汁；特别一提，五只锅贴都只系HKD14，我都好想屋企楼下有一间啊！除咗锅贴，仲叫咗炸猪扒同一碗豆腐花。首先讲下块炸猪排，系即时点蛋浆即炸嘅，热辣辣但水准一般，系平时都会食到嘅口味。而豆腐花真系好大碗，滑够滑，但食落就好似无乜黄豆味道。个人认为，好豆腐花系好难求嘅，要黄豆味重就可能唔够滑，所以过下口瘾嘅货仔算系咁啦。题外话，食豆腐花个人比较钟意不停落黄糖。于是我叫侍应加多少少黄糖，无谂过侍应会问我需唔需要换过半碗热啲嘅豆腐花，因为担心碗豆腐花唔够热啲黄糖唔溶。我真系非常惊讶，无谂到今时今日仲会遇到咁贴心嘅服务，基于唔好浪费，当然婉拒咗，不过谂番起真系难得少见嘅服务态度啊！总结番，经红磡去尖咀，不妨试下个「生煎鲜肉锅贴」，好食得泥又够平，试过就知无介绍错！系咁！