Macaroni Dessert Bar (已結業)

今晚早收工决定同老工拍拖揾好野食！俾我喺何文田港铁站附近发现一间西餐厅，外面睇餐厅装修几有品味，于是决定入去试试。一入去就有个亲切嘅侍应哥哥招呼我哋坐低喇。用电子餐牌好有型，拣野食都拣得开心啲😂今晩好肚饿，见Main course只要加$60就可转做set，咁抵就梗系点个Dinner set啦！头盘系烟三文鱼沙律同巴马火腿沙律，两个都正，最欣赏佢哋自己调啲白汁同黑醋汁，味道浓淡刚好。至于汤，今日个Daily soup系西兰花浓汤，真系有浓浓西兰花味，真材实料！Main course 有颇多款拣，我就拣咗羊架，老公就拣带子黑松露意大利饭。个羊架煎得坚正，我点medium rare，真系煮到刚刚好㖞，绝对无过熟过生！佢个薄荷烧汁都唔错，连唔钟意薄荷味嘅我都食晒！意大利饭系全晚亮点，芝士同黑松露味香浓，老公光速扒晒落肚，我只痴到两啖咋。食到呢度，两个已经饱到上心囗，所以我哋无再特别点其他甜品，只要跟餐个Daily desert：Tiramisu。以为会hea底啦，原来都落足心机嘅，蛋糕又香又滑，唔太甜，小小一件刚刚好！总结：一间用心做嘅小店，一定会再帮衬！