潮窩 (已結業)

香港人最钟意打边炉㗎啦！见天气凉凉地同男朋友去红磡黄埔打边炉，见到呢间潮窝，好精美～好新净！我哋又唔钟意食任食，宁愿食啲食物同环境都有质素嘅火锅店。就入咗去试吓。酱料都好干净啊。而且好多款拣沙嗲酱麻酱必备啦！都系我嘅至爱～打边炉我哋最钟意叫清凉啲嘅饮品，例如酸梅汤啊等等，今次就嗌咗竹蔗茅根，好清甜㖞。汤底方面，呢间餐厅都有好多选择！出边成日食开沙嗲鸳鸯汤底，今次我哋试吓啲比较特别嘅汤底，叫咗咸菜猪肚鸡汤。个汤底好足料，好多猪肚，差唔多有成只鸡咁滞。唔使讲一定要叫肥牛啦，我哋今次叫咗唔会太肥又唔会太瘦嘅安格斯牛小排。铺得好靓呀，而且好新鲜！而且食落好有牛味唔会太薄啱啱好。餐厅仲有好多特色嘅手打丸，例如我哋叫咗呢两款，都系有馅嘅丸！手打真系唔同啲！好弹牙而且入边有馅，好特别！虾丸入边有咸蛋，而墨鱼丸入边就有芥茉酱。出边好少有咁样嘅做法。火锅汤底好足料，就咁饮都好好味。当我地话埋单之际，店员仲话等一等，有糖水送啊！佢哋送咗一人一碗汤圆红豆沙，好满足。