Orange Elephant Thai Restaurant (博文街) (已搬遷) 新店位置

放工即兴同同事行咗去大角咀食晚饭，原来大角咀都有「Orange Elephant」。之前经过九龙城同北角已经想食橙象🧡🐘，呢日竟然系喺大角咀食！餐厅面积几大，坐得尚算舒服，而且我仲留意到店员真系正宗泰国人嚟🇹🇭，不过佢哋都识讲中文。椰青焗海鲜饭($104)，呢个饭真系以原个椰青焗制🥥。由于以大椰青作为器皿，所以份量真系超多！海鲜种类颇丰富，有大大只虾🦐、青口同鲜鱿等🦑。不过我自己更为欣赏系个椰汁，甜甜哋几惹味，亦令饭粒够湿润。你睇吓，我哋成个饭食哂㗎😃，超捧场。黄咖哩牛腩煲($86)，煲仔热辣辣🔥，黄咖哩辣度恰到好处。牛腩大大件之外，仲有我好钟意食嘅薯仔🥔。如果唔系叫咗椰青饭，我一定会叫碗白饭捞汁。酸辣去骨凤爪沙律(原价$72)，呢个系星期二嘅$1菜式。老实讲，七日入面我最无兴趣系呢样🙊。不过餐厅整得都算唔错，够开胃。饮品方面🥤，我哋要咗番石榴冰($28)同青柠梳打($28)，前者比较少见，味道几特别兼好饮🤤；后者则正正常常的好饮。总括嚟讲，橙象嘅泰菜大大碟，我哋两条友嗌三碟够哂食，埋单人均$150搞掂，比想像中平 😛。最后，我上载埋大大本A3 Size嘅餐牌以供参考。