金堡茶餐廳

营业中

休息中

 第三日去会展，亦唯独今日先唔系一支冷去会场，约左朋友食完早餐先去试酒！最近两个月喺湾仔都食过几次早餐，除左一次系OK 之外，次次出事！连一啲比较稳阵嘅连锁都濑野，所以今日由陀地带我觅食，希望食倒较为正常嘅早餐。同朋友讲早餐我做东，谂住佢会带我去特色啲嘅食肆食啦，点知佢带左我去一间叫金堡茶餐厅嘅茶记。佢话呢头嘅早餐，佢最信得过。好啦我同佢叫嘅野一样，沙爹牛肉面配肠仔蛋牛油方包，我要炒蛋，佢要煎蛋，餐饮我要冻柠茶，朋友叫左冻奶茶，每人盛惠HK$30 大圆。幸福原来好简单！其实一啲普通嘅食物都可以食倒幸福嘅感觉，大家睇图我谂都睇倒个面渌得几靓仔啦，沙爹牛肉又深色，食落个面渌得啱啱好，无生骨！家阵都唔知点解好多茶记都张啲面搞到极度Al Dente , 即系渌得极不透心，渌一阵就摆落碗度，有啲直情扬散个面都懒。做到呢度咁软硬适中已经系好少！沙爹牛肉个酱好好味，牛肉疏打落得好适中，唔会过焾。我嘅肠仔蛋到喇，肠同包都正常野，特别一提系个炒蛋，好滑呀! 火候控制得好，一啖食落口，已经食倒份Heart。总结: 终于喺湾仔食倒令人感动嘅诚意早餐。其实一啲普通嘅食材，用心去煮，亦可以好动人。