Achacha Food & Beverage Boutique (已結業)

上网见到几多人话好食，就谂住试下，但个体验真系差到忍唔住要写个负评！一入到去坐低无耐，店员就要求我地调位，调完过多阵另一位店员又要求我地再调翻去原本个个位，坐低左另一位店员又叫我地坐另一张枱，前后调左三次！店员安排差之余，同事之间又唔沟通，要客人调黎调去，身为客人真系觉得好无奈！我地点左个餐，另外点左个小食拼盘。味道方面，餐汤分量少，味道麻麻，蒜蓉法包超薄，柠檬特饮杯无味而且酸。意大利饭都算几好，黑松露味几浓同料多，暂时感觉都系还好。但食完个餐过左二十分钟，小食拼盘都仲未黎，我地叫店员跟一跟，但叫完又无回应，过左十分钟店员又过黎问翻我地争啲咩，系咪争一杯野饮同个饭(其实前面都问左三次，已经话黎左，而且佢地落单，应该会知我地点左咩)，个店员好似懵下懵下咁，完全无人系谂住帮我地跟进下... 再过二十分钟个小食拼盘都仲未黎，真系等到无哂耐性，叫佢跟左几次，等左起码四十五分钟都未黎到！小食拼盘终于黎到，店员先斟水比我地，个拼盘又唔系特别好食，成餐饭都食到成肚气。后尾食完睇翻评论先知原来好多人都系咁！服务差，上菜慢，食物又唔系特别好食，绝对唔会再帮衬呢间垃圾餐厅。