佳寧娜潮州菜

营业中

休息中

先嚟一个细嘅潮州四色拼盘，入面除咗有虾枣同蟹枣之外，仲有油泡带子同埋炸鱼片头。另一个头盘就系掌翼卤水拼盘，两个头盘嘅味道都唔错。跟住饮个汤，呢个炖汤好正，系螺头石斛花旗参汤，滋润得来好清热。陈皮香葱焗蚝砵系一个经典菜式，我都系第一次食，其实佢有啲似焗鱼肠，不过鱼肠就变成蚝仔，用陈皮去焗特别香。虽然呢个名叫做萝卜排骨春菜煲，不过大部份都系春菜，好好食，好少食到啲咁新鲜嘅春菜。豆豉面酱榄角蒸沙包龙趸最有惊喜，佢个酱汁做得非常之好，香得来有层次感，尤其是个榄角非常好食。埋尾竟然嚟个糖醋面真系俾佢杀个措手不及，味道好而且冇乜油。个糖水系桃胶蛋白杏仁茶，非常足料，好难识到啲咁有诚意嘅甜品。临尾仲送个姜汁红枣糕俾我哋食，再加埋功夫茶，真系一餐令人难忘嘅潮州菜。