+886 台味飯桌仔 (已結業)

最爱台式小食，尤其系夜市，真系可以食过不停～而家香港都好多台式舖头，今日入大围接老细收工，就揾到间几骨子嘅台式小食店，梗系要试下啦！！主食梗系要叫牛肉面啦～不过既然呢间有我至爱嘅冬粉，就叫个红烧牛肉冬粉！！原来佢仲有好多汤底可以拣…麻辣呀～胡麻呀～真系任君选择！！除咗平时食开嘅台湾香肠，仲有好多唔同嘅嘢可以拣……无骨盐酥鸡：鸡肉外脆内嫩，洒少少淮盐真系好惹味！！旗津黑轮片：黑轮片即系鱼肉片，不过比较薄身，炸完几弹牙，腌制得几好味！月亮虾饼：之前响第二间都食过，系用春卷皮定饺子皮夹住啲虾胶嚟炸，呢度嘅比较大块，但系就薄身啲，所以好脆口！虾胶够弹牙～爽口～点泰式甜辣酱好好味！！台南海鲜卷：有啲似潮式肉卷，不过入面包嘅系墨鱼胶同虾胶，仲有啲细细粒嘅墨鱼肉，又系好香口！台式饮品梗系唔少得啦！！我不嬲饮开奶绿，少甜少冰，个绿茶味好出，少少涩口，但我钟意！老细要台式奶茶，但系唔系跟波霸珍珠，反而跟红豆蓉，一样咁好味！呢度价钱经济实惠，食到饱饱肚都所费无几，难怪坐一阵就全场爆满，仲有人响门口等位添！