麥當勞

营业中

休息中

经过见到门口排长龙，行近啲八卦下，原来系绿茶雪糕。见到啲人一路行一路食，好似好滋味咁，搞到我心郁郁又排埋一份队。其实加3蚊多条kitkat有啲贵，但系我又未试过绿茶kitkat㖞，所以就忍痛嘟左10蚊叫左个有kitkat嘅。说时迟那时快，老麦妹妹以拔刀斋的速度，递左个甜筒俾我。一拿上手，忽然觉得手感沉实敦厚。原来甜筒纸厚度不菲，同哈记比起来，讲厚度的话有过之而无不及。伸脷一濑，清雅嘅绿茶香气充满了鼻腔。张口一咬，浓郁嘅绿茶味充满了口腔。咕噜一吞，淡淡嘅绿茶余韵充满了喉咙。因为系软雪糕，入口即溶，绿茶香气更加明显。因为有雪糕，所以kitkat唔会太甜。好好味，但系又唔舍得食太快。当我仲陶醉系个绿茶甜筒𠮶阵，唔经唔觉已经食埋最后一啖，但奇怪嘅系...个甜筒壳仍然坚挺，咬落仲脆卜卜！10蚊真系值回票价，但系下次我都系会买7蚊嘅，悭番啲钱。