亞泰廚房 (已結業)

蜜桃小丸子系九龙城试过唔少食肆后，今日终于要写重头戏，就系九龙城嘅泰国菜喇！九龙城素有香港小曼谷之称，泰国食肆开到成行成市，真系总有一间系你附近，今次就试位于狮子石道嘅亚泰厨房。舖头空间感十足，两个人可以坐四人枱，见到佢有啲大啲嘅梳化位，相信如果叫多啲朋友一齐食都会坐得舒服。第一道菜系泰式炒通菜。以前系屋企炒通菜，唔知系咪唔够镬气，梗系炒得唔爽脆。呢道菜就炒得好，有红辣椒、豆豉同蒜头，食落口有好香嘅蒜味，微辣，咸度适中，仲要热辣辣出紧烟，一食就知系厨房岩岩炒出嚟，好爽好脆，好食！第二道菜系招牌面包咖喱软壳蟹。啲面包好脆，软壳蟹好足料，唔会系瘦到食唔到肉嘅，质量甚高，咖哩内有红椒同青椒、洋葱同好多嘅葱，份量十足，将啲咖哩同面包捞埋一齐食，脑海里浮现出一句说话，就系「辛苦赚钱就是为了食好野！」第三道菜叫了泰式炸虾饼，啲虾肉好新鲜好弹牙，炸得刚刚好金黄色的，隔离有啲蕃茄同青瓜伴菜，就算食咗热气野都感觉无咁上火。总括嚟讲，食物质素高，价钱公道，坐得舒服，相信会再嚟试！