Sky726

前菜平日自己好少叫生蚝食，怕太腥同埋唔新鲜，难得今次朋友心血来潮想食就比个机会佢。半打$200有找，仲可以试到两件：爱尔兰同美国种，都算系咁～食落口味偏清爽唔会太重，够咸鲜，浅尝可以！不过份量比较单薄，如果肥美啲可能会仲正～小食朋友系食肉兽，怕只系叫主食唔够，就叫多咗款小食，而佢二话不说就拣咗鸡翼。本身谂住咁普通嘅嘢，好似无咩必要叫，上台之后见到就改观了。唔系睇餐牌都以为叫咗鸡腿仔，外观几有趣，咬落十分香脆清甜，又多汁，啲肉唔会鞋。整体蜜糖味道好出，都几甜，但同时蒜蓉味就无咁出了。如果有啲炸蒜片系面头可能会更滋味！主食呢排谂住健康啲夜晚都尽量戒淀粉，所以两个主食都拣咗肉类，一份鱼一份猪。我一向钟意食咸中带甜味嘅嘢，呢碟枫树糖浆烧银雪鱼伴牛油大蒜就深得我心。先要赞鱼嘅份量好多，远远已经闻到好香烧过嘅味道，食落糖浆有点焦糖化，更带出独特嘅甜味。鱼肉质嫩滑多汁，有适当油份，好正！另外叫嘅系慢煮黑毛猪鞍扒配意大利黑醋汁及牛肝菌酱，黑醋汁一点点放喺旁边，牛肝菌酱同啲菇菌一齐，唔咸但系几出味，唔错。主角猪胺非常淋，重猪香，边位系有啲肥但中和瘦肉部分觉得非常滋味！果然系王牌推荐款式，下次会叫两份～