翡翠拉麵小籠包 (已搬遷) 新店位置

呢度地方宽阔，比对以往我所认识嘅翡翠拉面小笼包，枱凳密质质和通道狭窄完全唔同，呢度嘅装修亦比较潮，冷气又凉，今日咁热，系呢度坐低食野特别享受。试过食物后，觉得系中上水平，小笼包一定唔算招牌，反为夫妻肺片和回锅肉较出色，个别菜式较油腻，或者这是上海菜嘅特色。夫妻肺片麻辣度足够，牛肚牛𦟌够入味，酱料仲加入花生碎，真系连汁都食埋，正啊！回锅肉 (薄饼) 酱汁浓，相当够热，回锅肉唔算太肥，加上豆腐干，椰菜，红椒青椒，夹住薄饼食，好味又有特色，不过食完后发觉碟里面剩低好多油，呢味菜颇油腻。上海炒年糕年糕烟韧，唔会太咸，不过酱汁太稀，唔能够挂喺年糕同埋椰菜面头，反而沉晒落底，所以我觉得呢味食品水准普通。小笼包小笼包外皮比较厚，缺乏弹性，好彩里面嘅汤汁同埋肉都够鲜味。萝卜丝酥饼热辣辣 外皮松化，可惜卖相丑陋，以味道而论，都系好食嘅，不过希望个样整得好睇啲。酒酿小丸子桂花味浓，丸子烟韧，中上之作。