越華會海鮮小館 (已搬遷) 新店位置

靓靓妈咪不但系一个标准电视迷，而且仲系Bobby哥o既忠实粉丝，所以近几个星期都喺度狂追睇「老友记」 。周末播完大结局，见屋企人都仲讲紧套剧，XO仔就建议大食会去Bobby哥有份开𠮶间「越华会海鲜小馆」度开餐。由于餐店就喺公司附近，小肥收咗工可以直接行过去，故亦专登订食六点半。去到门口先知原来食店只开晚市，彷佛专为夜鬼而设。门外o既广告牌所示，「越华会」乃得奖热店 ，招牌菜式以海鲜为主。食店占用面积两层，由正门入可乘搭私家升降机直达二楼o既大厅散座，或三楼o既厢房。二楼近窗一排卡位，六点半未到已坐满食客；中央o既大、中、小圆枱七点亦满座，似乎餐厅同老板之一o既Bobby哥一样都系咁受欢迎㖞 。厨房旁边有几个鱼缸，可见多只巨蟹同龙虾喺度游水，缸顶o既招牌仲有两只可爱o既龙虾气球点缀，主打菜式明显系蟹同龙虾。人未到齐，长辈都话要饮啤酒解解渴，消消暑，点知店子只售细樽装啤酒，又唔系几够冻 ，所以饮得唔系几够痛快。大食会各人都系因老友记效应，方才首次光顾「越华会」，点𩠌好自然地亦从两页「厨师推介」著手。点好菜，姐姐仔先派发湿纸巾。嘻嘻，湿纸巾上个厨师唛头望落真系好似Bobby哥㖞 。