新華茶餐廳

营业中

休息中

长沙湾深水埗青山道老舖一萝萝，旧香港风味情怀满载，好多都系家族经营一代传一代，好似新华咁。要怀旧就去到尽，睇吓餐牌封面个餐厅电话号码就知，后生啲嘅都唔知系乜东东。有二楼，疫情下一入去太子女就帮你探热之外，坐低后有人会帮你喷消毒液清洁枱面，10分细心周到。有咩食你自己慢慢睇啦，其实都系𠮶啲，要快我叫个特餐就算。绝对系好食唔好睇，每样野质素都高。奶茶系港式茶记灵魂，呢杯不负所托，细滑回甘，丝丝入扣。沙嗲牛肉面个面煮得啱啱好，面爽弹又够香。牛肉亦鲜嫩有肉味，可惜偏咸唔系太啱自己口味。多士用嘅面包亦高质素，新鲜有面香而且质感软熟稠密。每次去茶记都令你谂起全世界最难食嘅系嘉顿面包。奄列个样好平淡，用料亦系，但系煮得够香滑，虽然觉得油腻咗少少。食得几开心于是试埋佢哋出名嘅蛋挞，结果中伏。个酥皮入口即溶令你觉得唔系食紧酥皮，咁样好唔好就见仁见智。蛋浆略嫌太稀蛋味亦都唔够浓，整体感觉系水汪汪得个甜字。如果就系咁嘅质素我以后都唔会再食。呢餐胜在够气氛，食物质素亦可以接受，除个好好卖嘅蛋挞之外整体来讲相当唔错。