金鳳大餐廳 (山林道)

营业中

休息中

今晚約左朋友响山林道食飯，佢話好耐無食過牛扒，咁既然見到呢間咁老字號嘅牛扒店，緊係要去幫襯吓啦。入到去見到餐廳全full，呢間分店比總店大，舊有香港冰室裝修。雖然食牛扒好似油淋淋咁，但呢度仍然好乾淨。餐牌好多嘢揀，我哋就揀左一個港式扒，招牌牛柳餐，另一個就美式扒，美國牛小排餐，兩款扒都跟鐵扒上，一路食一路keep住熱。餐湯例牌紅白兩選，朋友話羅宋湯酸咪咪，夠開胃。而我就揀左忌廉湯，鹹鹹地，結結地，味道正常。餐飽軟軟暖暖，又大隻，搽埋牛油食，幾好，好耐無食過呢d餐飽喇。兩款扒加左生蒜，淋黑椒汁炸炸聲，份量足，各款有兩塊扒，容易share，同樣七成熟。招牌牛柳又厚又淋，入口軟熟，加埋黑椒汁超好食。美國牛小排都係厚，好有質感，厚實有咬口，都係連黑椒汁食好d。餐飲最後先叫，兩杯都夠晒大杯。朋友叫左杯少冰走甜凍奶茶，做到唔甜唔太凍之餘，茶味仲好濃添。我就叫左杯凍朱古力，夠濃夠甜又夠凍，飲埋佢飽晒。