生記飯店 (已搬遷) 新店位置

同前辈食饭，对方指明要到湾仔生记。旧式粤菜格局，连伙记招呼都偏「旧式」，斟水斟到「呯拎啪冷」，但胜在菜式交到货。枸杞浸猪润 - 猪润超厚身，咬落嫩滑够味，一啲都唔腥，非常出色！另一味姜葱桶蚝亦表现不俗，一碟四件蚝，份量唔多但胜在够大只，蚝有脆边够香口，咬到中间极肥美，葱同姜就咁食都几送饭。煎藕饼用嘅猪肉偏肥，咬落咸香有油份，加了马蹄增加了口感。反而最期待嘅咕噜肉就显得平平无奇，教人失望。最后点了两碗肉丸泥鯭粥，一入口尝到咸咸米香，即刻唤起儿时在旧式粥店食嘅回忆，前辈说应是加了腐竹，我怀疑系加左皮蛋。甜品是附送的白糖糕，久违的儿时点心，微甜带少少酸，吃的更多是回忆。