手作餃子專門店 (荔枝角道) (已結業)

发觉太子有好多间主打食饺子嘅面店，今次就嚟试下呢间手作饺子。舖头面积细同狭窄，客人坐得迫，冷气亦都唔系好够。舖头提供嘅饺子款式都几多，除左常见嘅韮菜同白菜猪肉外，仲有猪肉芝士、冬阴公、日式紫菜同薯仔鸡肉等等比较新颖嘅饺子，今次我地就叫左杂锦汤饺套餐A同B，另加8蚊叫埋上海面底。餐厅标榜汤饺嘅汤底喺老火汤，用上淮山花胶同猪骨嚟煲。一试之下味道清甜唔油腻，饮得出淡淡淮山味，仲有红萝卜、猪骨同黄豆汤渣，成碗饮哂都唔口渴。上海面面质爽硬但无咩面粉香味，味道比较普通。饺子每只都包到胀卜卜，落足料去整，而且饺子皮薄所以隐约会透到入面馅料嘅颜色。韮菜猪肉饺嘅韮菜比例几多，猪肉馅味道也不错。薯仔鸡肉饺入面以薯仔为主，鸡肉份量偏少，味道似我地平时屋企食开嘅咖哩薯仔炆鸡翼。而我最钟意嘅就系日式紫菜饺同猪肉芝士饺，紫菜饺食落有浓浓海水咸香味，而猪肉饺嘅芝士味比想像中重，味道唔错。食完7只饺子加面底已经好饱，下次谂唔到食咩都可以嚟呢到食抵食又大只嘅水饺。