老鍋台式火鍋 (京都廣場) (已結業)

星期日唔想煮饭，去左铜锣湾骆克道既老锅台式火锅打边炉。餐厅位置方便，系铜锣湾地铁站出口对面。今日食2人套餐，价钱$405。2人套餐包汤底二选一，可拣老锅秘制麻辣锅或老饕酸菜白肉锅。今日叫左老朋友老饕酸菜白肉锅，主角极品猪王花腩猪味浓，脆脆哋又烟韧。另一主角腌制东方大白菜就酸甜爽脆。汤底少少辣又酸酸地，好开胃。另配大量滑溜宽粉条同大量蔬菜如冬菇，蕃茄，粟米，同葱。套餐包精选肉类三选一，有牛，猪同鸡拣。我哋拣左嘉美农场鸡肉，一大碟份量唔少，超嫩滑食落又爽爽脆脆咁，好正，仲全部去哂皮。伴碟嘅梛菜丝都食得。套餐包丸饺拼盘，有弹牙同味道天然既墨鱼丸同香菇贡丸，个皮超烟韧既肥美鱼皮饺同蛋皮好簿既台湾蛋饺。每样各两粒。套餐包五彩鲜蔬盘（细），虽然唔系真系五彩，不过都有油墨菜，生菜，娃娃菜，金菇同两大粒鲜冬菇。质素唔错。最后仲有面食类，可选米线或白饭，我地例牌拣左米线。米线份量正常，好幼身，吸左个汤好好味道。自己去自助调料吧攞调味料。今餐所有食物质素都好好，坐得舒服又静局。