New Istanbul Kebab

营业中

休息中

香港嘅平安夜当然要去尖沙咀先够平安。11点喺码头走，行返呢头惊觉啲餐厅收得七七八八，唔想太颓食鱼蛋粉，又揾唔到心水，行到就嚟饿晕，求其冲咗入嚟。餐厅喺路口位，虽然面积唔大，但都几开扬。由装修，到餐牌，以至店员，都好有中东味道。餐牌嘅中文全部差唔多，饭类大致$80以上，骤眼睇都系转转肉同转转肉，唔识分嘅应该几难拣。pizza同卷都有好多选择，仲有啲几特别嘅甜品同饮品。Iskender kebab酱汁系西班牙风嘅肉酱芝士，芝士平均地融咗喺饭上面，再铺上一层酱，每啖饭都非常滋味。更惊奇嘅系呢个多利亚style嘅饭上面系有中东风味嘅炭火烤肉，一啖摆入口，好有层次，令人欲罢不能，味蕾都出走埋。Mixed doner转转肉大杂烩。虽然一个饭$98一啲都唔平，但啲转转肉份量十足，加上系清真肉，其实值回票价。配搭略嫌太干，稍一不慎就畀啲肉𠝹亲咀，建议怒落酱汁𩠌饭。叫做连埋前菜同甜品（春卷、薯条同布丁），埋单$292 for 2，可能系最抵食嘅圣诞大餐。餐厅24小时营业，无论几时行过都系肚饿救星。