聰嫂·原素 (已結業)

我相信大家都食过聪嫂嘅甜品，而早前全线聪嫂甜品结束营业后，聪嫂呢两个字就沉寂左一排，而最近就有一间新嘅餐厅叫做聪嫂原素。印象中之前北角已经有一间分店，而家再喺坑口聪嫂甜品原址重开餐厅，吸引到我去试吓。店内有块黑板写住大概八款嘅小菜套餐， 十分多选择，除咗套餐外Menu上亦都有好多种类嘅素食，包括焗饭，炒粉面饭，炖汤同埋聪嫂最出名嘅甜品。我今次就试咗佢个小菜套餐就系黑椒素叉烧同埋再另外嗌左个主食就系咖喱薯仔素牛腩饭。小菜套餐真系好抵，佢包例汤白饭同埋甜品，叉烧嘅份量都唔少，仲有几条菜心铺底，感觉上好健康，叉烧十分惹味，我估佢嘅做法应该系用麦芽糖烤焗过，外皮脆脆地，同出边素食餐厅嘅叉烧都差唔多味，但都值得一试。而咖喱薯仔素牛腩饭就有好多咖喱汁，咖喱汁似港式茶餐厅咖喱，有少少辣但椰汁味重中和到个辣味，而且薯仔有炸过，所以亦都好好味，素牛腩我觉得就有少少似素咕噜肉咁，份量都唔少。小菜套餐附送嘅甜品系芝麻糊，一向都唔系太钟意食芝麻糊嘅我都觉得好浓郁，下次会试吓其他甜品