聰嫂星級甜品 (已結業)

同J友人喺時代廣場睇完場七點半，大家都有啲餓，所以就走咗去後面街一間連劉德華 都有幫襯o既「聰嫂私房甜品」度食甜品。「聰嫂私房甜品」門外大大個綠色招牌加射燈非常搶眼，好難走雞。光顧當晚為週三，食客人數只有四成左右，衛生舒適感屬一般，坐矮矮o既長枱圓櫈仔都唔會覺得太過逼，不過人多小肥一定唔會入去試，費事自己辛苦。入座不到一分鐘，面黑黑o既嬸嬸隨即遞上餐牌，並無多餘o既對答，不甚友善 ！落完單好快就有野食，嬸嬸送上甜品時都只係放喺枱邊，要食客自行分配，服務態度頗劣；要XO仔比錢買難受，未食都已覺超唔抵  ！士多啤梨豆腐花（$27）：所謂「士多啤梨豆腐花」其實唔係士多啤梨味o既豆腐花，而係一碗面層舖滿士多啤梨雪糕塊o既豆腐花。配搭其實幾新穎，有咗雪糕調味，豆腐花唔再需要加糖漿，同時因為雪糕微嚡o既質感，豆腐花變得更滑，不過問題係雪糕較粉，唔係細佬杯茶囉 ！椰汁芒果西米露（$26）：J友人最愛食酸辣食品，但係睇見其食相就好比IQ博士入面個超人食酸梅乾咁，眼咪咪、嘴嘟嘟、口角皺紋四散，佢唔講出口都知碗芒果甜品酸到爆 ！哈，離開甜品店後，友人口中酸感未退，更狠批店舖應改名為「聰嫂酸品」！