美心MX (已結業)

今日约咗师傅嚟整电话，点知个师傅鬼咁晏都唔嚟，后嚟仲话要星期一先可以整，见时间已接近 7 pm, 懒懒地都系费事煮饭，屋企有张美心 $10 coupon, 就行过嚟食晚饭算啦。喺大家乐食扒餐就食得多喇，但从未试过喺美心食，于是就叫咗两份肉眼牛扒铁板餐，一份配香煎猪扒，另一份配香煎鱼柳，每份 $42, 减咗 $10 优惠券，即系 $74. 件牛扒无大家乐𠮶块咁大咁厚，虽然唔韧，但都无乜肉汁，块猪扒同鱼柳就一般喇，未至于难食嘅，但亦毫无惊喜。个汁竟然一啲黑椒味都无，幸好薯角仍有少少脆口。整个餐份量算少，饮品可选即磨咖啡、汽水或西汤。老公仲话点解实物同墙上宣传海报内相片相差咁远嘅？ 点解啲牛扒唔系好似张相咁一格格嘅？ 临走前有个女店员过嚟执拾枱面，见我地预备离开仲主动同我地讲多谢及拜拜，服务质素蛮不错啊。