釜之魂釜飯專門店 (淘大商場) (已結業)

呢间专卖日本釜饭嘅餐厅好似已经开咗好耐，仲记得之前呢个位系一间吉列猪扒饭专门店，今次晚饭时段喺淘大行完街，醒起呢间餐厅，就决定晚餐喺度解决。餐厅主要系主打釜饭，足足有成十几款可以选择，有选择困难症嘅我都谂咗一阵先拣到。背面仲有小食同甜品可以拣。作为鳗鱼爱好者，见到鳗鱼谂都唔谂就拣咗佢，一上枱真系吓咗一下，鳗鱼好足料，好肥美，识落啖啖肉好实在，肉质好扎实。旁边亦都有一啲蔬菜，而底下嘅饭份量原来都好多吓，食到最后会有饭焦，呢个真系几惊喜。由细到大都好钟意食番薯，每次到日本都必食，今次见到呢间餐厅有，当然要叫一客。不过呢个就冇乜特别，本身以为佢系好似大学芋，表面系包裹着焦糖，但原来只有小小，如果焦糖更多甜到高啲嘅话，应该会更加好食。另外仲叫咗一客手羽，上枱𠮶阵时啱啱炸起，所以食落好脆。最后当然唔少得叫返份甜品啦，其实成餐饭最期待就系呢个黄豆粉蕨饼，呢个同样都系每次去日本必食，虽然一份份量唔大，但系做饭后甜品，呢个份量就啱啱好。