宜家家居餐廳及咖啡室

营业中

休息中

上个星期六要去宜家买嘢，顺便喺餐厅食晚餐，之前对呢间餐厅嘅印象一般，因为觉得𠮶啲食物都系好普通，可能我自己买返屋企煮仲好食过佢好多，但系今次竟然有意外惊喜，就系佢嘅脆猪手啦！结果我哋三个人叫咗两只嚟食，因为食过一只之后好想再食，虽然佢嘅份量都已经唔细，切出嚟嘅肉都好多，不过我哋几个都系食肉兽，所以就再叫多一只！第一，佢嘅温度维持得相当好，虽然我买完都唔系即刻食，因为仲要揾位，但系揾到位之后再食，都唔算话特别凉咗，所以对佢嘅印象已经好好，然之后切开里面嘅肉质系相当之唔错，个皮固然系焗得够脆，里面嘅肉亦都唔会话干到冇晒肉汁，十分好食，再加埋酸椰菜，都系我钟意嘅，伴碟嘅薯仔就真系好普通，可能分开整，所以啲薯仔已经冻晒，根本食唔落，不过有呢只猪手就够啦，我另外叫咗个小龙虾沙律，真系唔会再试啦，因为啲小龙虾一啲鲜味都冇，我谂同食张纸都冇分别，沙律菜唔算太差，但系份量相当之少，所以对于个沙律系失望嘅。