花月庭 (已結業)

一嚟到行一圈已经觉得超级多嘢食！首先食海鲜，大大只开边龙虾爽口弹牙，啲虾都好正，只只劲爽甜，feel到真系好新鲜！长脚蟹好重海水味好好食，而且啲肉质都够实净！青口对比下相对普通，比较淡。生豪要排队攞，一次可以攞两只，唔算好大只但都新鲜嘅。之后试咗我今次嚟嘅target! 片皮鸭同鹅肝多士！片皮鸭自助餐嚟讲算几好，几香，师傅唔会片得太细块同埋会黐啲鸭肉，唔错，同埋包住𠮶块皮唔会太厚太硬。我最后食咗五块！鹅肝自然甘香，如果再煎得金黄少少就更perfect! 多士真系好脆，就算索咗鹅肝啲油都唔会觉得好腻！最后个酱系我最欣赏嘅！佢系芒果酱，酸酸甜甜估唔到同鹅肝咁夹，食落令成件事清新啲！另外都值得提呢个排队切嘅牛同羊架。个牛好稔！稔到好似炆牛𦟌咁，加埋个烧肉汁超好食！羊架都系啱啱好粉红色，腌得好入味唔洗点汁都得，食𠮶阵拨开面头啲香草就冇咁咸！不过个烧M5和牛就令我有少少失望，个汁同黑椒盖过咗本身片牛肉嘅牛味，同埋烧得过咗少少龙，食唔出系靓牛肉。仲有好多其他嘢食，但其实都试唔晒所有，真系太多款啦！甜品都有好多款，蛋糕、奶冻、啫喱、豆腐花、朱古力喷泉、连芋圆都有，仲有8只味嘅movenpick雪糕！